Kur mendoni për efektet negative të menopauzës në shëndetin e grave, vëmendja shkon kryesisht te kockat që bëhen më të brishta ndaj riskut të frakturave. Por, sipas një studimi amerikan të publikuar së fundi në revistën "Menopause" edhe shëndeti oral e në veçanti ai i mishit të dhëmbëve e vuan këtë periudhë ndryshimesh të mëdha.

"Kemi vënë re se te gratë me një risk të lartë të frakturave kockore, çrregullimet e mishrave të dhëmbëve janë një tregues shumë i rëndësishëm", shpjegon Leena Palomo nga Universiteti i Stomatologjisë në Ohajo dhe koordinatore e studimit. Bashkë me kolegët e saj, Palomo ka analizuar të dhënat e databazës së klinikës "Case/Cleveland clinic postmenopausal ëellness collaboration", nga ku u seleksionuan gratë e përfshira në analizë. Këto ishin gra në menopauzë prej më shumë se 1 viti dhe më pak se 10 vjetësh, jo-duhanpirëse, me hemoglobinë glikosilate më të ulët se 7%, gra që në 5 vitet e shkuara kishin përdorur terapi hormonale, barna për diabetin ose për të parandaluar humbjen e densitetit kockor.

"Kemi ekzaminuar riskun e frakturave të këtyre grave duke përdorur shkallën matëse Frax", pohon ekspertja, e cila shpjegon se kjo pajisje e veçantë ndihmon në stabilizimin e riskut, duke pasur parasysh edhe faktorë si pesha, gjatësia, fraktura të mëparshme, artritin, diabetin dhe duhanpirjen.

Nga analiza doli se kur rezultati Frax e tejkalonte 20% përqindëshin (risku i frakturave i lidhur me osteoporozën konsiderohej i lartë) edhe mishrat e dhëmbëve rezultonin veçanërisht të rrezikuara.

"Shenjat e periodontitit janë më të rënda te gratë me risk të lartë frakturash në krahasim me ato të parrezikuara, edhe pse higjiena orale nuk tregon diferencë të madhe mes dy grupeve", vazhdon studiuesja. "Para se të dalim në përfundime definitive duhen edhe studime të tjera, por nga rezultatet e marra duket se shkalla matëse FRAX mund të përfaqësojë një mjet efikas për identifikimin e grave, të cilat pas ardhjes së menopauzës janë edhe më të riskuara nga problemet me mishrat e dhëmbëve.