Procesi diagnostikues i një lezioni oral të pazakontë

M. Gobbo, G. Ottaviani, K. Rupela, R. Bussani, V. Zoi, M. Franco, G. Tirelli, M. Biasotto

Pothuajse çdo ind neoplastik që rritet në brendësi të zgavrës orale përkufizohet "tumor i zgavrës orale". Kanceri oral mund të fillojë si lezion primar, si lezion metastatik që vjen nga një tumor primitiv në një pjesë tjetër ose nga përhapja nga një strukturë anatomike fqinje. Midis lezioneve primare, karcinoma e qelizave skuamoze paraqet më shumë se 90% të neoplazive malinje të zgavrës orale dhe është shpesh e diagnostikuar në moshë të rritur. Në të kundërt sarkomat e indeve të buta, që përbëjnë më pak se 1% të lezioneve orale, janë të diagnostikuara rrallë te pacientët e rritur dhe më shpesh te adoleshentët (8 - 12 raste në vit në çdo 1.000.000 pacientë).

Rabdomiosarkoma është një tumor malinj i indeve të buta që e ka origjinën nga muskuli skeletik; është përshkruar fillimisht në 1854 dhe paraqet më shumë se 50% të sarkomave të indeve të buta te pacientët e rinj. Diagnostikimi i një rabdomiosarkome është shpesh e vështirë duke qenë se, klinikisht, nuk ka karakteristika patognomonike dhe unike.

Është sjellë rasti i një rabdomiosarkome e krahasueshme lehtësisht me një lezion me origjinë odontogjene, e diagnostikuar te një djalë 24 vjeç. Për të arritur te diagnostikimi përfundimtar janë të nevojshme më shumë faza dhe teknika si histopatologjia, imuno-histokimia dhe grafi, si edhe aspekti klinik. Pacienti ishte duke marrë një terapi antibiotike dhe anti-inflamatore (amoksicilinë 875 mg + acid clavulanik 125 mg; ibuprofen 600 mg) prej dy muajsh, për një fryrje në zonën bukale dhe zigomatike në pjesën e majtë, e diagnostikuar si lungë odontogjene me fillim tek elementi 2.8 i vestibularizuar, megjithatë pa ndonjë përmirësim klinik.

Në anamnezë pacienti ka mohuar praninë e patologjive specifike, alergjive ose marrjen e barnave. Por ka referuar gjithashtu mungesë të dhimbjeve, hiperpireksi apo gjakosje te masa që ndodhej te elementi 2.8. Në ekzaminim vërehej një asimetri shumë e vogël jashtë gojës, që lidhej me praninë e një ënjtjeje brenda gojës ekzofitike, e fortë, e palëvizshme dhe me eritremë dhe ektazi në gjëndrën Stenone. Në nivelin bukal pacienti paraqiste një ulcerë fibroze me kufij të dallueshëm, mundësisht të shkaktuar nga kontakti kronik me elementin 2.8.

Diagnoza e hershme e lezioneve malinje të zgavrës së gojës ka një rol përcaktues për prognozën. Është e nevojshme të përshtatet një qëndrim kritik dhe i ndërgjegjshëm në mënyrë që të shmangen gabimet diagnostike dhe më pas ato terapeutike. Përveç kësaj është e nevojshme që në rastet kur kemi dyshime të dërgohen menjëherë te strukturat e specializuar për të optimizuar menaxhimin e planit diagnostiko - terapeutik.

Artikullin e plotë e gjeni në seksionin Të ndryshme nga dentistria në Download Center.

Përktheu: Valbona Spahia