Ënjtje e qiellzës nga një ulcerë

G. Mergoni, M. Manfredi, M. Meleti, E. Merigo, L. Corcione, A. Sarraj, T. Simonazzi, P. Vescovi

Paraqitet në klinikë një pacient mashkull, 56 vjeç, i thirrur nga vetë mjeku me diagnozë ulcerë të pjesës së fortë të qiellzës në anën e majtë. Pacienti referon që rreth 10 ditë më parë ishte shfaqur një ënjtje e cila shkaktonte dhimbje në pjesën e qiellzës, kishte marrë barna për të dhe qetësues për një javë. Por ënjtja ishte rritur në mënyrë progresive dhe rreth dy ditë më parë kishte marrë formën e ulcerës. I alarmuar për përparimin e shpejtë të lezionit ai i ishte drejtuar stomatologut të tij të besuar, i cili i kishte kërkuar një ortopantomografi, që kishte rezultuar negative për lezionet në kockën e nofullave.
Klinikisht lezioni paraqitet si ënjtje me diametër rreth 2 cm duke patur në qendër një ulcerë rrethore në formë krateri rreth 1 cm me kufij të qartë dhe të zbuluar (fig. 1). Ulcera vishej nga një material i ngjashëm me fibrat. Në momentin e vizitës pacienti thotë se ndjen vetëm një bezdisje të lehtë në mungesë të paresthesia. Nuk ka lezione të tjera në mukozën e zgavrës së gojës. Anamneza përjashton trauma të fundit mekanike dhe termike në nivelin e qiellzës, ndërsa është pozitive për shfaqjen periodike të afteve, sidomos në nivelin e buzës së poshtme dhe të mukozës, që zakonisht largohen për një javë. Nuk ka patur ngjarje të tilla më parë që të mund të lidhen me shfaqjen e lezionit. Pacienti referon se është një duhanpirës dhe se merr cardioaspirina, pas një shfaqjeje të angina pectoris 3 vjet më parë dhe simvastatina për trajtimin e hiperkolesterolemisë. Vlerësimet e fundit hemato-kimike nuk evidentojnë vlera anormale.

Diagnoza dhe trajtimi
Pavarësisht se anamneza lejon të përjashtohet një shkak traumatik, aspekti klinik i lezionit nuk lejon që të vendoset një diagnozë e sigurt. Prandaj, pasi është marrë konsensusi nga ana e pacientit, është e nevojshme një biopsi me anë të prerjes së lezionit. Në diagnozën diferenciale janë marrë në konsideratë shfaqje të lezioneve malinje (karcinoma e qelizave skuamoze, carcinoma cistike, leucemi, linçoma), ulcera me etiologji infektive (tuberkulozi,sifilizi terciar) dhe ulcera beninje me natyrë inflamatore (afte madhore). Analiza mikroskopike e kampionit të marrë për biopsi zbulon një kuadër të sialadenitis kronik me regres atrofik, që lidhet me një infiltrim të rëndësishëm inflamator (fig.2). Kuadri anatomo-patologjik rezulton në përputhje me diagnozën e sialadenitis nekrotizues (SN).
SN - ja është një proces reaktiv inflamator nekrotizues i gjëndrave të pështymës. Është një gjendje e rrallë, beninje, që vërehet me shpesh në nivel të gjëndrave të vogla të pështymës në pjesën e fortë të qiellzës. Edhe pse etiologjia është e panjohur autorët besojnë se në vijim të faktorëve predispozues (trauma, injeksione të anestetikëve lokalë, proteza të lëvizshme të papërshtatshme, ndërhyrjeve kirurgjike, duhan pirjes) krijohet një difekt i mikroqarkullimit me pasojë nekrozën ishemike të indit. SN-ja ka si tendecë të zgjidhet në mënyrë spontane me kalimin e muajit (fig.3).
Karakteristika që e zbulon më shumë patologjinë konsiston në aspektin makroskopik dhe mikroskopik, që mund të sjellë një diagnozë të gabuar të lezioneve malinje. Në fakt ulcera në gjendje të rëndë me fillim të shpejtë dhe metaplazi skuamoze që vëzhgohen gjatë rrjedhës së SN-së mund të çojnë në dhënien e diagnozës së karcinomës së qelizave skuamoze ose karcinomës mukoepidermoide, me trajtime të mëtejshme invazive të panevojshme. Analizimi i kujdesshëm i kampionit të biopsisë nga ana e një patologu ekspert dhe vëzhgimi i evoluimit në kuadrin klinik janë gjithashtu thelbësor për një diagnozë të saktë.

Përktheu: Valbona Spahia

Figura 1 Aspekti klinik i lezionit: Ënjtja në formën e ulcerës në pjesën e fortë të qiellzës

Figura 2 Aspektet histologjie të kampionit të biopsisë së vënë në dukje një kuadër të sialadenitis kronik me regres atrofik, që lidhet me një infiltrim të rëndësishëm inflamtor (hematoksilina e eosinës, zmadhim 4X)