Parandalimi i patologjive orale që në periudhën e shtatzënisë. Projekti interesant në Ariano Irpino

"Të lindësh me një buzëqeshje": ky titull tregon shumë mbi qëllimet e projektit të integruar të promovimit të shëndetit oral në favor të grave shtatzëna dhe të foshnjave të tyre, që tashmë po zhvillohet prej pothuajse 3 vitesh në Ariano Irpino, në provincën e Avellino, pranë divizionit të Obstetrikës dhe gjinekologjisë së spitalit "Sant'Ottone Frangipane".

Takimi me stomatologun është futur në brendësi të kursit "Pjesëmarrja e prindërve-përgatitja për lindje", që i ofron çifteve një instrument të vlefshëm për të arritur në mënyrë të ndërgjegjshme në lindje.
Projekti i lindur në 2014 është zhvilluar me lezionet frontale dhe instruksione të higjienës orale, vizita të nënave të ardhshme dhe shërbime të higjienës profesionale si dhe vizita post partum. Në këto tre vite janë "edukuar" 210 gra, janë kryer 231 vizita specialistike dhe 243 heqje të tartarit.

"Fusha stomatologjike" - referon Pina Florenzano, e cila është referuesja stomatologe e projektit - "buron nga disa konsiderata: në shtatzëni nivelet e rritura të estrogjenit prodhojnë ndryshime që prekin mukozën orale dhe e bëjnë atë të predispozuar në mënyrë të ekzagjeruar ndaj sëmundjes parodontale; literatura vë në dukje që patologjitë e zgavrës orale, në mënyrë specifike sëmundja parodontale, përbëjnë një faktor risku të lartë në përcaktimin e lindjeve premature, peshë të vogël të foshnjës, pre-eklampsi."

Rrallë herë, gratë në shtatzëni janë të informuara mjaftueshëm mbi shkaqet e fillimit dhe evoluimit të kariesit dhe patologjisë gingivale si dhe mbi metodat që mund të zbatohen për t'i parandaluar; rrallë njohin pasojat që një higjienë e dobët orale mund të ketë te foshnja; rrallë janë të informuara mbi rëndësinë e fluoroprofilaksisë.
Megjithatë, siç shpjegon doktoresha Florenzano: "Nëse gruaja shtatzënë merr masat e përshtatshme të higjienës orale, nuk verifikohen ndryshime të rëndësishme në mukozat orale dhe te gingivat; në edukimin për parandalim paraqiten, së pari, ato sjellje që lejojnë arritjen dhe mbajtjen e një gjendjeje optimale të mirëqenies së gjithë organizmit. Mësimi i fëmijëve që të kenë kujdes për veten, për trupin e tyre dhe për shëndetin e tyre, duke favorizuar mësimin dhe zgjedhjen e stileve korrekte të jetesës është një investim i shkëlqyer individual dhe social për të ardhmen. Nga ana tjetër, mësimi rezulton një proces kompleks në të cilin niveli i njohjes dhe ai emocional mbështeten dhe integrohen te njëri tjetri, prandaj ambienti familjar, natyrisht së bashku me atë shkollor, rezultojnë më të përshtatshëm sidomos në fëmijërinë e hershme."

Pra është e nevojshme që ndërhyrjet për parandalim të jenë gjithnjë të synuara dhe të parakohshme gjatë shtatzënisë, një periudhë shumë e veçantë kjo në jetën e një gruaje që e bën veçanërisht të ndjeshme dhe perceptuese ndaj gjithçkaje që mund të prekë shëndetin e saj apo të foshnjës.

Adelmo Calatroni

Përktheu: Valbona Spahia