Ënjtje gingivale pranë rrënjëve të dhëmbëve

PREZANTIMI I RASTIT
Paraqitet pranë nesh një pacient mashkull 43 vjeçar, duke u ankuar për praninë e një ënjtjeje gingivale të rrumbullakët në zonën anteriore të maksilës superiore. Pacienti referon se ka vërejtur lezionin kohë më parë (ndonjë vit) dhe nuk ka shkuar ta vizitojë te specialisti nga pakujdesia dhe nga rrjedhojat simptomatologjike depresive. Megjithatë raporton se ka vërejtur një rritje të lehtë por progresive të dimensioneve të lezionit në fjalë.
Në testin objektiv intraoral lezioni paraqitet si një ënjtje me konsistencë të zvogëluar, me ngjyrë rozë uniforme, të mirë demarkuar nga indet e shëndetshme rrethuese e lidhur me elementet 1.2 dhe 1.3 (fig.1). Dimensionet janë rreth 1 cm dhe nuk ka shenja as ulcerash as uji të shndritshëm purulent. Testi radiografik endoral (fig.2) lejon gjithashtu përjashtimin e çfarëdo lloj përfshirje të indeve të forta rrethuese dhe së bashku me karakteristikat klinike lejon që të mendojmë absolutisht për formë beninje të lezionit.

Fig. 1 Lezion i dukshëm gingival i rrumbullakët, në testin objektiv intraoral, lidhur me elementet 1.2 dhe 1.3

Fig. 2 Radiografia endorale nuk tregon shenja të përfshirjes së indeve të forta përreth lezionit

Në bazë të testit histologjik u përcaktua diagnoza epulis me qeliza gjigante

DIAGNOZA DHE KURA
Me marrjen e miratimit të informuar nga pacienti për trajtimin dhe duke parë karakteristikat klinike mendohet për formë beninje (marzhe neto, asnjë përfshirje kockore, konsistencë e butë, ngjyrë uniforme, mungesë ulcerash dhe/apo nekrozash, demarkim i qartë nga indet përreth), vijohet me ekscizionin total të lezionit me marzhe perilezionale prej 1 mm. Rrënjët e elementeve dentare që lidhen me të (1.2 dhe 1.3) pastrohen me shumë kujdes dhe lëmohen me qëllim për të hequr qelizat e ligamentit periodontal që me siguri janë me origjinë nga lezioni. Mostra për biopsi futet menjëherë në formalinë 4% dhe dërgohet në laborator për analizën histologjike (fig. 3). Periosteum përreth zonës që i nënshtrohet heqjes, gërryhet me lamën e bisturisë në mënyrë që të ngrejë lembon dhe të shmangë lënien e indit kockor të ekspozuar (fig. 4).
Patologu zbulon praninë e qelizave gjigante shumëbërthamore të shpërndara në një stromë edematoze dhe me mukus që përmbante enë gjaku dhe fibroblaste. Në bazë të testit histologjik përcaktohet diagnoza e epulis me qeliza gjigante. Etiologjia përfshin një agjent toksik irritues inflamator që stimulon përhapjen abnormale (beninje) të qelizave të ligamentit periodontal.
Për një shërim të plotë, trajtimi përfshin ekscizionin e thjeshtë dhe heqjen e të gjithë faktorëve irritues lokalë.

Fig. 3 Lezioni, i hequr plotësisht, ka dimensione rreth 1 cm

Fig. 4 Pikat e qepjes të shkëputura. Janë kryer prerje horizontale në periosteum vestibular për të mobilizuar sa më shumë të jetë e mundur lembon dhe ta ngrenë me drejtim nga kurora në mënyrë që të lënë të ekspozuar një sasi minimale të kockës.

Përktheu: Erjola Taga