Filler inovativ për matjen e xhepave periodontal nëpërmjet cone-beam

Nga Figini Lara

Periodontiti (PD) është një sëmundje inflamatore me origjinë bakteriale që nëse neglizhohet mund të kulmojë me humbjen e dhëmbëve. Karakteristikat histopatologjike të PD janë:

• Humbja e epitelit/ngjitje e indit lidhor të gingivës me sipërfaqet radikolare
• Migrimi apikal i epitelit lidhës
• Formim i mëtejshëm i xhepave periodontal (PP)

Xhepat periodontal janë njësi infeksioni me baktere patogjene kryesisht anaerobe, por të vlerësosh me saktësi formën dhe dimensionet e tyre nuk është aq e thjeshtë. Vlerësimi konvencional i PP është kryer për më shumë se 70 vjet nëpërmjet sondimit manual me një sondë periodontale, matjet e të cilit janë të varura nga faktorë që mund të çojnë në nënvlerësimin apo mbivlerësimin e thellësisë së PP: ndryshime presioni nga një ekzaminues në tjetrin, kënd i ndryshëm i futjes së sondës periodontale, prania apo mungesa e inflamacionit dhe/ose tartar nën gingival. Nga kjo pikëpamje mund të përfitojmë nga teknologjia e imazheve dixhitale në 3-D që mund të na japë matje më të shpejta dhe precize si të thellësisë, si të formës dhe të dimensioneve në 3-D të xhepave periodontal.

Tipologjia e kërkimit dhe mënyra e analizimit
Në një studim të kohëve të fundit të publikuar në Dental Materials në prill 2018, propozohet dhe analizohet in vitro një filler mikro-qelizor radiopak për të lejuar që të përftojmë imazhe në 3-D me rezolucion të lartë nëpërmjet tomografisë së kompjuterizuar (TC) të xhepave periodontal të simuluar. Nga ky filler eksperimental autorët kanë hetuar biokompatibilitetin/toksicitetin dhe kanë vlerësuar edhe nëse një kapacitet antibakterial plotësues mund të futet në një mbushës të tillë nëpërmjet inkorporimit të një përbërje të amoniakut kuaternar (QAC). Vlerat që lidhen me radiopacitetin e oksideve të metalit janë përftuar nëpërmjet radiografisë konvencionale dhe tomografisë mikro të kompjuterizuar (CT). 3-(4,5-dimetiltiazol-2-il)-2,5-difeniltetrazol bromur (MTT) është përdorur për të matur biokompatibilitetin e grimcave të filler-it të tungstatit të kalciumit (CaWO4) duke përcaktuar përqindjen e keratinociteve vitale (5) pas ekspozimit ndaj filler-it. Në vijim është futur një antibakterial (K21) në filler-in radiopak dhe janë kryer testet e rritjes mikrobike duke përdorur shtame të Prophyromonas gengivalis (P. gingivalis) dhe Streptococcus gordonii (S. gordonii) të kultivuar në agar gjaku.

Rezultate
Filler-i i CaWO2 me mikrogrimca ka shfaqur një radiopacitet me rreze X shumë të dallueshëm nga strukturat e dhëmbit që ka lejuar pamjen tredimensionale të një xhepi periodontal të krijuar në mënyrë artificiale nëpërmjet tomografisë së kompjuterizuar. Testet MTT kanë treguar se grimcat CaWO4 janë shumë biokompatibël (duke rritur vitalitetin e keratinociteve të ekspozuara). CaWO4 i kombinuar me K21 ka treguar një aktivitet domethënës antimikrobik për P. gingivalis dhe S. gordonii.

Konkluzione
Nga ky studim in vitro del në pah se injektimi i filler-it CaWO4 me mikrogrimca në xhepat periodontal lejon pamjen e shpejtë në 3-D të tyre duke i riprodhuar me precizion sipas formës dhe dimensionit, duke lejuar që të dallohen mirë indet e buta nga struktura e dhëmbit duke garantuar biokompatibilitetin dhe funksionin antimikrobik nëse shtohet me një agjent antibakterial K21.

Implikimet klinike
Kjo metodë e propozuar nga autorët in vitro ofron perspektiva të mira për analizimin e xhepave periodontal. Teste të mëtejshme in vitro dhe eksperimentime klinike janë të nevojshme për të konfirmuar këto të dhëna. Funksione të tjera antimikrobike mund të mundësohen duke i shtuar agjentë të tjerë të përshtatshëm këtij agjenti kontrasti.

Për më tepër:
Elashiry M, Meghil MM, Kalathingal S, Buchanan A, Rajendran M, Elrefai R, Ochieng M, Elawady A, Arce RM, Sandhage KH, Cutler CW. Development of radiopaque, biocompatible, antimicrobial, micro-particle fillers for micro-CT imaging of simulated periodontal pockets. Dent Mater 2018 Apr;34(4):569-78.

Përktheu: Erjola Taga