Lezion i bardhë lingual që lidhet me manifestimet kutane

PREZANTIMI I RASTIT

Paraqitet pranë nesh një paciente 35 vjeçare për praninë, prej disa muajsh, të një lezioni të bardhë jo të dhimbshëm në nivelin lingual; pacientja referon gjithashtu shfaqjen kontekstuale të lezioneve që shkaktojnë kruajtje në nivelin e gjymtyrëve të sipërme.
Testi klinik dëshmon në kurrizin lingual një njollë të gjerë, të bardhë, që nuk largohet me fërkim; përveç lezionit fillestar janë të dukshme gjithmonë në kurrizin lingual (fig.1), lezione satelite me karakteristika të njëjta por me dimensione më të vogla. Në nivelin e parakrahëve dhe duarve (fig. 2,3) vihen re gjithashtu lezione papulare dhe makulare me ngjyrë me tendencë në të kuqe për vlerësimin e të cilave pacientja është në pritje të konsulencës dermatologjike. Me marrjen e konsentit të informuar, i kërkohen pacientes teste hematokimike kontrolli dhe programohet kryerja e biopsisë incisionale të lezionit kryesor për kryerjen e një testi histologjik.

Fig. 1 Njolla e bardhë që nuk largohet me fërkim e pranishme në kurrizin lingual

ZGJIDHJA E RASTIT KLINIK

Fig. 2 Papula që shkakton kruajtje e pranishme në dorë

Fig. 3 Makula e dukshme në parakrah

DIAGNOZA DHE KURA

Testi histologjik dokumenton praninë e hiperkeratozës, hipergranulozës, degjenerimit të vakuolave të keratinociteve të shtresës bazale dhe infiltratit inflamator kryesisht limfoqelizor në nivelin e vetë laminës për një diagnozë të lichen planus (LP).
LP është një sëmundje muko-kutane me origjinë autoimune që prek rreth 1% të popullsisë, më shpesh seksin femëror midis 50 dhe 70 vjeç. Patogjeneza duhet kërkuar në një reagim të ndërmjetësuar nga qeliza, nga ana e limfociteve T citotoksike drejt keratinociteve të shtresës bazale për të cilat është i hamendësueshëm një modifikim antigjenik nxitur nga agjentët kimikë, biologjikë apo farmakologjikë. Stresi dhe faktorët psikosomatikë do të favorizonin zhvillimin e lezioneve. Është dokumentuar lidhja midis LP dhe virusit të hepatitit C (kërkuar me rezultat negativ në pacienten subjekt të rastit klinik). Lokalizimi oral mund të paraprijë prej muajsh shfaqjen e lezioneve kutane. Lezionet orale kanë tendencën ndaj bilateralitetit, që prekin më shumë faqet dhe gjuhën; lezioni në formën e tij elementare është një papulë e bardhë. Papulat duke u grumbulluar i lënë vendin aspekteve të ndryshme klinike: në lichen retikular (forma më e zakonshme) janë të pranishme shirita hiperkeratotike (shirita të Wickham) me pamje arborescent apo unazore në lichen me pllaka (forma klinike e hasur te pacientja) lezioni na kujton një leukoplaki ose një kandidozë kronike hiperplastike, lichen atrofik karakterizohet nga prania e zonave eritematoze që lidhen me zonat retikulare ose me ato si njolla, në formën erozive janë të pranishme zona eritematoze me ulcera të mbuluara nga pseudo membranat fibrinoze të rrethuara nga margo me shirita retikular; ndonjëherë një formë e tillë paraprihet nga një formë më pak e zakonshme, formë bulloze me vezikula dhe flluska që çahen lehtësisht. Format atrofike dhe erozive lidhen pothuajse gjithmonë me dhimbje, dysgeusia, jargëzim. Shfaqja kutane karakterizohet nga shfaqja e papulave të kuqe në formë rrethore me kruajtje në gjoks, kurriz dhe gjymtyrë. Lichen planus mund të prekë dhe gjenitalet dhe shtratin e thonjve. Nuk ka uniformitet në pikëpamje për sa i përket literaturës mbi predispozitën e mundshme të pacientit të prekur nga format atrofike dhe erozive me zhvillimin e karcinomës së qelizave skuamoze (potenciali preneoplastik sidoqoftë do të ishte mjaft i ulët, midis 0,2 dhe 4%).
Trajtimi parashikon përdorimin e kortikosteroidëve lokalë ose në rrugë sistemike (në forma që lidhen me simptomatologjinë); janë përdorur me sukses dhe retinoide lokale për cilësitë e tyre antikeratinizuese. Në rastin e infeksionit nga Candida është i nevojshëm trajtimi me antimykotikë.

Burimi: Dental Cadmos

Përktheu: Erjola Taga