Ndryshimet në efikasitetin e ciklit mastikator dhe në forcën e kafshimit tek individët me periodontit

Nga Lara Figini

Qëllimi kryesor i stomatologut aktualisht është ai i parandalimit të humbjes së dhëmbëve dhe ndihma për ruajtjen e funksioneve të sakta të sistemit stomatognatik.

Megjithatë, ruajtja e dhëmbëve me mbështetje të reduktuar kockore, siç ndodh në rastet e periodontitit, mund të influencojë mbi funksionin shqisor të atashmentit periodontal, redukton qëndrueshmërinë dentare në mbështetjen mekanike duke dëmtuar procesin mastikator.

Funksioni mastikator varet nga forca e muskujve mastikatorë, nga sasia dhe cilësia e dhëmbëve dhe nga faktorë të jashtëm si konsistenca e një ushqimi dhe sasia e përdorur në secilin cikël mastikator.

Përveç kësaj, përshtatja e intensitetit të forcës mastikatore ndaj fortësisë së ushqimit varet nga informacionet e marra nga mekanoreceptorët periodontale, por që rezultojnë të reduktuar në rastet e periodontitit.

Tipologjia e kërkimit dhe modaliteti i analizës
Në një studim të publikuar në International Journal of Health Science në shkurt 2019 autorët kanë vlerësuar efektin nga periodontiti mbi efikasitetin e ciklit mastikator dhe mbi forcën maksimale mastikatore.

Njëzet e katër individë janë ndarë në dy grupe: me periodontit (grupi I: mosha mesatare ± devijimi standard/DS, DS, 51,3 ± 2,8 vite, nr. = 12) dhe pa periodontit (grupi II: mosha mesatare ± DS, 48,9 ± 2,4 vite, nr. = 12).

Efikasiteti mastikator është vlerësuar nëpërmjet ekzaminimit elektromiografik të muskujve maseter dhe temporalë. Forca maksimale e kafshimit është regjistruar për regjionet molare djathtas dhe majtas.

Të dhënat janë tabuluar dhe i janë nënshtruar analizave statistikore (P≤0,05). Ushqime të ndryshme natyrale dhe artificiale janë përdorur për të vlerësuar funksionin mastikator.

Rezultate
Nga rezultatet e studimit ka dalë një diferencë e konsiderueshme ndërmjet grupeve për muskulin master djathtas gjatë përtypjes së rrushit të thatë (P = 0,04), kikirikëve (P = 0,02) dhe biokapsulave (P = 0,01).

Analiza e regresimit multiple ka treguar influencën e lëvizshmërisë dentare mbi efikasitetin e ciklit mastikator për kikirikët (P = 0,03) dhe biokapsulat (P = 0,01).

Forca maksimale e kafshimit për regjionin e molarëve të majtë ka rezultuar në mënyrë të konsiderueshme e ndryshme ndërmjet dy grupeve (P = 0,02). Lëvizshmëria dentare ka rezultuar e ndryshueshme me efektin më të madh mbi efikasitetin mastikator.

Grupi i periodontitit ka treguar një forcë kafshimi të reduktuar në krahasim me grupin e kontrollit.

Konkluzione
Nga të dhënat e nxjerra nga ky studim, që në fakt duhet të konfirmohen me punime të tjera analoge, mund të dalim në përfundimin se humbja e mbështetjes periodontale ka një impakt negativ mbi efikasitetin e ciklit mastikator dhe mbi forcën mastikatore.

Implikime klinike
Kryerja e trajtimeve periodontale për të reduktuar në minimum lëvizshmërinë dentare është e rëndësishme për të ruajtur shëndetin oral, por edhe për të përmirësuar efikasitetin mastikator dhe forcën e përtypjes tek individët e prekur nga sëmundja periodontale.

Për më tepër:
Palinkas M, Borges TF, Junior MT, Monteiro SAC, Bottacin FS, Mestriner-Junior W, Regalo IH, Siéssere S, Semprini M, Regalo SCH. Alterations in masticatory cycle efficiency and bite force in individuals with periodontitis. Int J Health Sci 2019 Jan-Feb;13(1):25-9.

Përktheu: Valbona Spahia