Duhani ngatërron diagnostikimin periodontal duke përdorur biomarker të pështymës

Nga Lara Figini

Tashmë është vendosur që duhani ka efekte të dëmshme mbi shëndetin sistemik dhe oral. Ai përfaqëson një nga faktorët e riskut të sigurt për periodontitin qoftë te duhanpirësit aktivë qoftë tek ata pasivë.

Duhani ndryshon përgjigjen normale inflamatore të bartësit, aq sa te duhanpirësit ndeshet një shkatërrim më i madh periodontal, humbje më e madhe e atashmentit klinik, thellësi më të madhe të sondimit, humbje më të madhe të dhëmbëve dhe humbje më të madhe të kockës alveolare (ABL) në krahasim me joduhanpirësit.

Është konstatuar, përveç të tjerave, se edhe individët që kanë lënë duhanin nuk mund ta ulin riskun për periodontit në nivelin e individëve që nuk kanë pirë kurrë duhan.

Tipologjia e kërkimit dhe modaliteti i analizës
Në një studim të publikuar në Journal of Periodontology në maj 2019, autorët kanë studiuar efektin e duhanit te biomarkatorët periodontalë të pështymës, si matrica metaloproteinazë MMP-8, matrica metaloproteinazë MMP-9, inhibitori indor i metaloproteinazës (TIMP)-1 dhe mieloperoksidaza (MPO).

Autorët kanë analizuar biomarkatorët në një popullsi që përfshin një kohort të rastësishëm me 480 pacientë që i janë nënshtruar angiografisë koronarike dhe ekzaminimit oral. Te biomarkatorët janë studiuar edhe efektet e kohës që është kaluar nga lënia e duhanit.

Rezultate
Përqendrimet e pështymës në MMP-8, MMP-9, TIMP-1 dhe MPO kanë dalluar në mënyrë të konsiderueshme pacientët e prekur nga periodontiti nga ata që nuk kishin periodontit. Shtimi i informacionit mbi zakonet e duhanpirjes ka përmirësuar në mënyrë të konsiderueshme ndjeshmërinë e të gjithë biomarkerave.

Në modelin e regresionit logjistik, përqendrimi i MMP-8 salivare rezulton kryesisht e kushtëzuar nga koha (vitet) që pacienti ka konsumuar duhanin, ndërsa përqendrimet e MMP-9, TIMP-1 dhe MPO salivarë janë më të kushtëzuar nga koha e kaluar që nga lënia e duhanit.

Konkluzione
Nga të dhënat e nxjerra nga ky studim, që duhet të konfirmohen me punime të tjera analoge, mund të dalim në konkluzionin se duhani ngatërron diagnostikimin e periodontitit nga pështyma dhe duhet të merret në konsideratë në interpretimin e rezultateve të marra nga teste të mundshme diagnostikuese.

Për më tepër:
Lahdentausta L, Paju S, Mäntylä P, Buhlin K, Pietiäinen M, Tervahartiala T, Nieminen MS, Sinisalo J, Sorsa T, Pussinen PJ. Smoking confounds the periodontal diagnostics using saliva biomarkers. J Periodontol 2019 May;90(5):475-83.

Përktheu: Valbona Spahia