Probiotikët në periodontologji dhe efikasiteti i tyre

Nga Lara Figini

Pastrimi i gurëzave dhe lëmimi i rrënjës (SRP) paraqesin "standardin e artë" për trajtimin e periodontitit, megjithatë pjesët e trajtuar janë subjekt i rikolonizimeve me një mikrobiotë të ngjashme me atë që ka qenë e pranishme përpara terapisë dhe ndaj për trajtimin e periodontitit janë propozuar terapi koadjuvante si terapia antibiotike, terapia fotodinamike antimikrobiale dhe terapia probiotike.

Organizata Botërore e Shëndetësisë (OBSH) ka përcaktuar probiotikët si "mikroorganizma të gjallë, të cilët nëse administrohen në sasi të përshtatshme, janë të dobishëm për bartësin."

Tipologjia e kërkimit dhe modaliteti i analizës
Në një studim klinik të randomizuar të kontrolluar që është publikuar në Journal of Clinical Periodontology në tetor 2018 autorët kanë vlerësuar efektin e administrimit të probiotikëve që përmbajnë Bifidobacterium animalis subsp. Lactis B (B. lactis) dhe HN019 si koadjuvantë të terapive tradicionale periodontale të pastrimit të gurëzave dhe lëmimit të rrënjës (SRP) te pacientët me periodontit kronik të gjeneralizuar. Dyzet e një pacientë me periodontit kronik janë regjistruar dhe monitoruar klinikisht, imunologjikisht dhe mikrobiologjikisht në kohën e fillimit (përpara SRP) dhe 30 e 90 ditë pas SRP.

Të gjithë pacientët janë ndarë në mënyrë rastësore në një nga dy grupet:
• Grupi Test (SRP + Probiotikë n=20);
• Grupi i Kontrollit (SRP + Placebo, n=20).

Probiotikët janë administruar dy herë në ditë për 30 ditë. Të dhënat janë analizuar në mënyrë statistikore.

Rezultate
Grupi i testit ka paraqitur një zvogëlim të thellësisë së sondimit të xhepave dhe një fitim të atashmentit klinik në mënyrë të konsiderueshme më të madh në krahasim me atë të grupit të kontrollit për 90 ditë. Grupi i testit ka treguar edhe një numër në mënyrë të konsiderueshme më të ulët të patogjenëve periodontalë, përveç niveleve më të ulëta të citokinave proinflamatore në krahasim me grupin e kontrollit. Vetëm grupi i testit ka treguar një rritje të numrit të çifteve të ADN-së me HN019 të B. lac-tis në biofilmin gingival për 30 dhe 90 ditë.

Konkluzione
Nga të dhënat e nxjerra nga ky studim, që duhet të konfirmohen me studime të tjera analoge, mund të dalim në përfundimin se përdorimi i B. lactis HN019 përveç terapive tradicionale periodontale SRP promovon efekte klinike të mëtejshme përfituese, mikrobiologjike dhe imunologjike në trajtimin e periodontitit kronik.

Implikacione klinike
Administrimi i B. lactis HN019 si koadjuvant i pastrimit të gurëzave dhe lëmimit të rrënjës mund të reduktojë nevojën për terapi periodontale shtesë pas trajtimit jo kirurgjikal të periodontitit kronik.

Për më tepër:
J Clin Periodontol. 2018 Oct;45(10):1198-1210. Effects of Bifidobacterium probiotic on the treatment of chronic periodontitis: A randomized clinical trial. Invernici MM, Salvador SL, Silva PHF, Soares MSM, Casarin R, Palioto DB, Souza SLS, Taba M Jr, Novaes AB Jr, Furlaneto FAC, Messora MR

Përktheu: Valbona Spahia