A ekziston një lidhje ndërmjet periodontitit dhe psoriazës?

Nga Giulia Palandrani

Periodontiti është një sëmundje inflamatore kronike që vjen nga një infeksion oportunist i biofilmit të pllakës endogjene. Periodontiti prek mbi 50% të adultëve në të gjithë botën dhe 5-10% paraqet një formë të rëndë të sëmundjes që çon në humbjen e dhëmbëve.

Psoriaza është një sëmundje multisistemike inflamatore kronike që verifikohet kryesisht në dermë dhe epidermë, duke prekur 1-3% të popullsisë. Është sugjeruar që bakteret mund të kenë një rol të rëndësishëm në imunopatogjenezën e saj.

Në këtë kuptim, këto dy sëmundje paraqesin një proces të ngjashëm imunopatogjenik dhe faktorë të përbashkët risku.
Studime të ndryshme tregojnë një humbje më të madhe kockore te pacientët me psoriazë dhe në të njëjtën kohë një shtim të riskut të psoriazës te pacientët periodontalë.

Tipologjia e kërkimit dhe modaliteti i analizës
Në studimin rast-kontroll, të publikuar në Journal of Periodontology në prill 2019, janë ekzaminuar 397 individë me psoriazë (raste) dhe 359 individë pa psoriazë (kontrolli).
Të gjithë individët i janë nënshtruar një ekzaminimi periodontal të plotë dhe janë vlerësuar parametra të ndryshëm: thellësia e sondimit (PD), niveli i atashmentit klinik (CAL), gjakrrjedhja gjatë sondimit (BOP), indeksi i pllakës (PI).

Përveç kësaj, janë regjistruar të dhënat që na interesojnë: gjinia, mosha, të ardhurat familjare, niveli i edukimit, përdorimi i fillit interdentar, frekuenca e larjes së dhëmbëve, indeksi i masës trupore, diabeti, përdorimi i barnave anti-ankth dhe antidepresivëve, zakonet e duhanpirjes dhe konsumimi i alkoolit.

Rezultate
Përsa i përket variablave, individët me psoriazë kanë treguar një BMI në mënyrë të konsiderueshme më të lartë (p<0,001), diabet (p=0,002), përdorim të anksiolitikëve (p=0,002), antidepresivëve (p=0,006) dhe duhanit (p=0,022).

Një prevalencë më e madhe e periodontitit është observuar në grupin e rasteve (46,1%) në krahasim me grupin e kontrollit (33,1%). Përveç të tjerash, prevalenca e periodontitit është rritur në mënyrë të konsiderueshme në bazë të shkallës së rëndesës së formave të psoriazës (e lehtë 44,4%, e moderuar 46,3% dhe e rëndë 47,1%) të dhëna që tregojnë një lidhje ndërmjet këtyre sëmundjeve.

Në të kundërt, studimi i tanishëm nuk konfirmon një lidhje ndërmjet shkallës së rëndesës së personave të prekur nga periodontiti dhe një pranie më të madhe të psoriazës.

Konkluzione
Studimi tregon një lidhje ndërmjet psoriazës dhe periodontitit. Megjithatë, këto rezultat mund të konsiderohen një pikë fillimi dhe janë të nevojshme punime të tjera për të konsoliduar këto të dhëna.

Për më tepër:
Mendes VS, Cota LOM, Costa AA, Oliveira AMSD, Costa FO. Periodontitis as another comorbidity associated with psoriasis: a case‐control study. Journal of Periodontology 2019;90(4):358-66.

Përktheu: Valbona Spahia