Lidhja ndërmjet periodontitit kronik dhe H.pylori oral: të dhënat nga një meta-analizë e fundit

Nga Lara Figini

Periodontiti kronik (CP) përfaqëson 95% të sëmundjeve periodontale. Pjesa më e madhe e pacientëve me CP përbëhet nga adultë dhe norma e prevalencës rritet në mënyrë dramatike pas moshës 35 vjeç. Mikroorganizmat e pllakës bakteriale orale dhe produktet e tyre si peroksidi i hidrogjenit janë faktorë risku për CP-në.

Studime të shumta kanë treguar se prania e Helicobacter pylori lidhet ngushtë me gastritin kronik dhe ulcerat duodenale, e që mikroorganizmat e pranishëm në pllakën bakteriale orale dhe në pështymë kryejnë një rol si rezervuar i mundshëm për H. pylori.

Studime të ndryshme në literaturë sugjerojnë që H. pylori në pllakën orale është një faktor i lartë risku për infeksionin gastrik përsëritës.

Por prania e H. pylori në pllakën orale a mund të jetë një faktor risku për periodontitin kronik?

Tipologjia e kërkimit dhe modaliteti i analizës
Në një rishikim, të publikuar në PLoS One në dhjetor 2019, autorët kanë kryer një meta-analizë të artikujve të publikuar në literaturë për lidhjen ndërmjet H. pylori dhe CP.

Për të kryer këtë meta-analizë janë kërkuar artikuj të publikuar nga viti 2000-2018 nëpërmjet PubMed, OVID, Springer Link, Chinese National Knowledge Infrastructure (CNKI).
Janë vlerësuar odds ratio (OR) dhe intervalet e besueshmërisë me 95% (CI) për lidhjen ndërmjet H. pylori dhe periodontitit kronik (CP). Janë analizuar heterogjenitetet dhe janë kryer edhe analiza të parcialitetit dhe nëngrupeve.

Rezultate
Nga 918 artikuj të identifikuar, që trajtonin lidhjen ndërmjet H. pylori oral dhe CP, 11 studime u vlerësuan se ishin në përputhje me kriteret e përfshirjes. Nga rezultatet H. pylori oral duket se lidhet me CP.

Një gjendje H.pylori-pozitive rrit në mënyrë të konsiderueshme riskun e CP me 3,42 herë (OR = 3,42; IC 95% = 2,71-4,31). Një test diagnostikues që përdor reaksionin zinxhir të polimerazës (PCR) ka treguar një prevalencë më të lartë të H. pylori (OR = 3,70; IC 95% = 2,66-5,14) në krahasim me atë që rezulton nëpërmjet testit të shpejtë të ureazës (RUT) (OR = 3,13; IC në 95% = 2,26-4,34).

Konkluzione
Nga të dhënat e marra nga kjo meta-analizë, që duhet të konfirmohen me rishikime të tjera analoge, mund të dalim në përfundimin se periodontiti kronik (CP) mund të lidhet me H. pylori oral tek adultët dhe që H. pylori oral mund të jetë një faktor i mundshëm risku për CP.

Implikacione klinike
Infeksioni nga H. pylori është një infeksion gastrointestinal i zakonshëm që mund të shkaktojë efekte patologjike, të shtojë stresin oksidativ dhe të induktojë përgjigje inflamatore.
Interesi për H. pylori oral është shtuar me shpejtësi, sepse prania e këtij bakteri në gojë shpesh lidhet me periodontitin kronik.

Për më tepër:
Wei X, Zhao HQ, Ma C, Zhang AB, Feng H, Zhang D, Liu C. The association between chronic periodontitis and oral Helicobacter pylori: a meta-analysis. PLoS One 2019 Dec 11;14(12):e0225247.

Përktheu: Valbona Spahia