Proteza parciale të lëvizshme dhe shëndeti periodontal i dhëmbëve ku mbështeten

Nga Lara Figini

Disa pacientë nuk janë në gjendje të lejojnë trajtimin implantar për arsye anatomike apo ekonomike, prandaj rehabilitimi me proteza parciale të lëvizshme (RPD) mund të konsiderohet një opsion i thjeshtë jo invaziv trajtimi relativisht ekonomik për rehabilitimin e një harkade dentare.

Protezat parciale të lëvizshme (RPD) janë vatra të pamohueshme bakteriale dhe luajnë një rol të rëndësishëm në shëndetin e periodontium të dhëmbëve ngjitur.

Tipologjia e kërkimit dhe modaliteti i analizës
Në një studim klinik, të publikuar në European Journal of Dentistry në shtator 2015, autorët kanë vlerësuar ndikimin e protezave parciale të lëvizshme (RPD) në shëndetin periodontal të dhëmbëve ku mbështeten në krahasim me dhëmbët ku nuk mbështeten.

Një total prej 107 pacientësh me RPD ka marrë pjesë në studim. Janë ekzaminuar 138 RPD, ku 87 ishin me grep dhe 51 me kapëse.

Parametrat periodontalë janë vlerësuar qoftë për dhëmbët mbështetës të protezave të lëvizshme qoftë për dhëmbët jo mbështetës:
• indeksi i pllakës (PLI);
• indeksi i tartarit (CI);
• gjakrrjedhja gjatë sondimit (BOP);
• thellësia e sondimit (PD) (mm);
• indeksi i lëvizshmërisë së dhëmbëve (TM).

Këto matje klinike janë kryer në kohën 0, menjëherë përpara vendosjes së RPD, 1 muaj dhe 3 muaj pas vendosjes së protezës.

Rezultate
Pikët mesatare për PLI, CI, BOP, PD dhe treguesin TM, të dhëmbëve mbështetës dhe të atyre jo mbështetës, nuk ishin shumë të ndryshëm në momentin e inserimit të RPD (koha 0). Pas 1 muaji, PLI ka rezultuar në mënyrë të konsiderueshme më e lartë për dhëmbët mbështetës në krahasim me ata jo mbështetës.

Pas 3 muajsh janë verifikuar diferenca të rëndësishme ndërmjet dhëmbëve mbështetës dhe atyre jo mbështetës duke ju referuar BOP (1,53±0,50 e 1,76±0,43 respektivisht), PD (0,28±0,45 e 0,12±0,33 respektivisht) e PLI (1,20±0,46 e 0,75±0,64 respektivisht).

Një diferencë e pakonsiderueshme është ndeshur për TM dhe CI te të dy grupet.

Konkluzione
Nga të dhënat e nxjerra nga ky studim, mund të dalim në përfundimin se protezat parciale të lëvizshme paraqesin një vatër të padiskutueshme bakteriale veçanërisht për dhëmbët që mbështetin protezat prandaj është e nevojshme një vëmendje më e madhe dhe një kujdes nga ana e pacientit gjatë manovrave të higjienës në shtëpi dhe është e këshillueshme të respektohen rigorozisht kontrollet dhe trajtimet e higjienës profesionale që duhet të programohen të paktën 4 herë në vit.

Implikime klinike
Personat që mbajnë RPD duhet të motivohen nga profesionistët që të ruajnë një higjienë orale të shkëlqyer. Rekomandohet fortësisht që stomatologët t'i rikujtojnë këtyre pacientëve instruksionet higjienike orale të përshtatshme për të shmangur dëmtimet periodontale të shkaktuara nga mbartja e pashmangshme bakteriale e paraqitur nga RPD, kryesisht në krahasim me dhëmbët që mbështesin vetë protezat.

Për më tepër: Dula LJ, Shala KS, Pustina-Krasniqi T, Bicaj T, Ahmedi EF. The influence of removable partial dentures on the periodontal health of abutment and non-abutment teeth. Eur J Dent 2015 Jul-Sep;9(3):382-6.

Përktheu: Valbona Spahia