Efekti i fenotipit gingival në shëndetin periodontal

Nga Lara Figini

Seminari botëror i 2017 për klasifikimin e sëmundjes periodontale dhe gjendjeve peri-implantare ka rekomanduar përshtatjen e termit "fenotip periodontal" nga ana e komunitetit periodontal. Ky term përfshin fenotipin gingival (vëllimi gingival tridimensional si trashësia gingivale/GT dhe gjerësia e indit të keratinizuar/KTw) dhe trashësia e planit kockor facial dhe/ose bukal (morfotipi kockor).
Faktorë të ndryshëm, si një fenotip periodontal i hollë dhe mungesa e sulmit gingival AG. Mund të kontribuojnë në fillimin e recesioneve gingivale.
Një rishikim sistematik, me meta-analizën e vitit 2016 ka evidentuar rezultatet afatgjata të recesioneve gingivale vestibulare të patrajtuara në fenotipet periodontale të holla dhe ka sjellë një probabilitet të lartë të progresionit të recesioneve edhe tek individët me një higjienë të mirë orale.

Tipologjia e kërkimit dhe modaliteti i analizës
Në një rishikim të fundit, të publikuar në Journal of Periodontology në mars 2020, autorët kanë hetuar rëndësinë e konvertimit të fenotipit gingival të hollë në një fenotip të trashë për ruajtjen e shëndetit periodontal.
Autorët kanë kryer një kërkim të literaturës elektronike dhe të asaj manuale duke identifikuar një total prej 1129 studimesh, pasi kanë përcaktuar këto 3 çështje klinikisht të rëndësishme të fokusuara në temën për përfshirjen e rolit të fenotipit gingival.
Çështjet të cilave është kërkuar që t'i jepet përgjigje janë:
1.Cilët janë faktorët që ndikojnë fenotipin gingival (për shembull, mosha, seksi, harkada dentare, raca, forma e kurorës së dhëmbit, etj.)?
2.A ka një diferencë ndërmjet fenotipit gingival të hollë dhe të trashë në termat e shëndetit gingival?
Konvertimi i gingivave nga një fenotip gingival i hollë në një fenotip gingival të trashë në pjesët pa defekte mukogingivale ndihmon në ruajtjen e shëndetit periodontal?

Rezultate
Pas analizës së titujve, abstraktit dhe tekstit të plotë, 30 artikuj janë përfshirë në rishikimin përfundimtar. Njëzet e pesë studime kanë përmbushur kriteret e përfshirjes dhe kanë ofruar të dhëna për pyetjen e parë. Është parë që fenotipi periodontal ndryshon ndërmjet individëve të ndryshëm dhe zonave të ndryshme të gojës tek i njëjti individ.
Individët aziatikë priren që të kenë një fenotip gingival më të hollë në krahasim me individët e bardhë. Njëmbëdhjetë studime kanë përmbushur kriteret e përfshirjes për pyetjen e dytë. Prevalenca dhe shkalla e rëndesës së recesionit gingival kanë rezultuar më të larta në pjesët me gingivë të hollë në krahasim me pjesët me gingivë të trashë. Asnjë studim nuk ka ofruar të dhëna për pyetjen e tretë.

Konkluzione
Nga të dhënat e nxjerra nga ky rishikim, që duhet të konfirmohen me punime të tjera analoge, mund të dalim në përfundimin se evidenca e disponueshme tregon që individët me gingivë të hollë dhe të ngushtë priren që të kenë një predispozitë më të madhe për të zhvilluar recesione gingivale, në krahasim me ata me gingivë të trashë dhe të gjerë, edhe në kushte të mira të higjienës orale.

Implikime klinike
Stomatologu duhet të marrë në konsideratë që individët me gingivë të hollë dhe të ngushtë priren që të zhvillojnë më shpesh recesione gingivale, por për fat të keq në literaturë nuk ka akoma studime të disponueshme shkencërisht të vlerfshme që mbështesin kryerjen e trajtimeve periodontale që janë në gjendje të arrijnë konvertimin nga fenotipi gingival i hollë në fenotipin gingival të trashë në pjesët pa recesion gingival dhe pa defekte mukogingivale.

Për më shumë informacione:
Kim DM, Bassir SH, Nguyen TT. Effect of gingival phenotype on the maintenance of periodontal health: an American Academy of Periodontology best evidence review. J Periodontol 2020 Mar;91(3):311-38.
Jepsen S, Caton JG, Albandar JM et al. Periodontal manifestations of systemic diseases and developmental and acquired conditions: consensus report of workgroup 3 of the 2017 World Workshop on the Classification of Periodontal and Peri-Implant Diseases and Conditions. J Periodontol 2018;89(Suppl 1):S237-48.
Chambrone L, Tatakis DN. Long-term outcomes of untreated buccal gingival recessions: a systematic review and meta-analysis. J Periodontol 2016;87:796-808.

Përktheu: Valbona Spahia