Bakteret e pranishme te pacientët jo duhanpirës dhe të prekur nga parodontiti kronik në mungesë të sëmundjeve sistemike

Giovanni Giorgetti, Carlo Mirra

Qëllimi i punës: Të përshkruajë prevalencën e 11 baktereve parodontopatogjene te pacientët e prekur nga parodontiti kronik, para se të kryejnë çfarëdo lloj trajtimi.

Materiale dhe metoda: Janë seleksionuar 508 pacientë, 250 meshkuj dhe 258 femra, me moshë mesatare 38 vjeç +/- 12 gjatë gjithë vitit 2013. Janë përfshirë të gjithë ata pacientë që paraqisnin një parodontit kronik me BOP+ dhe xhepa prej të paktën 4 mm dhe jo më të thellë se 7 mm, që pas marrjes së mostrës mikrobiologjike paraqisnin një përqendrim të baktereve të tillë që, përveç SRP kërkonin edhe antibiotik. Për më tepër nuk ishte i pranishëm asnjë duhanpirës, asnjë patologji sistemike dhe asnjë nuk konsumonte barna. Marrja e mostrës është kryer nëpërmjet koneve me letër sterile, të futur në 5 njësi të ndryshme ku xhepi ishte të paktën 4 mm me BOP+. Megjithatë asnjë pacient nuk kishte marrë antibiotik as nuk kishte përdorur shpëlarës goje për të paktën 30 ditë para marrjes së mostrës. Për sa i përket teknikës së marrjes së mostrës janë përdorur kone me letër sterile me formë të konit në rritje dhe është pritur rreth 20 sekonda para se të hiqej koni, duke bërë kujdes për të mbajtur zonën të thatë. Në përgjithësi janë marrë kampione në 2540 njësi. Analizat kryhen nga laboratori "Biocontrol". Segmentet e ADN bakteriale janë amplifikuar nëpërmjet multiplex PCR (Polymerase Chain Reaction). Produktet e amplifikuara janë analizuar nëpërmjet reverse dot-blot. Prania e ADN bakteriale përcaktohet nëpërmjet hibridizimit invers: sekuenca gjenetike të amplifikuara hibridizojnë në mënyrë specifike me sonda oligonukleotide të lidhura me një membranë.

Rezultate: rezultatet janë ndarë në dy semestre dhe janë raportuar vetëm të dhënat në të cilat njësitë janë formuar në koloni (CFU) dhe janë më të mëdha se 10³.

Baktere	% aq sa kërkon terapi me antibiotikë
Aa = Aggregatibacter actinomycetemcomitans	12,75
Pg = Porphyromonas gingivalis	72,06
Tf = Tannerella forsythia	75,39
Td = Treponema denticola	70,59
Pi = Prevotella intermedia	36,76
Pm = Peptostreptococcus micros	28,43
Fn = Fusobacterium nucleatum/periodonticum	33,82
Cr = Campylobacter rectus	40,2
En = Eubacterium nodatum	21,57
Ec = Eikenella corrodens	27,45
Cs = Capnocytophaga spec. (gingivalis, ochracea, sputigena)	30,39

Tab1: % e baktereve në semestrin e parë të vitit 2013 në 204 pacientë

Grafiku 1: % e baktereve në semestrin e parë të vitit 2013 në 204 pacientë

Baktere	% aq sa kërkon terapi me antibiotikë
Aa = Aggregatibacter actinomycetemcomitans	12,5
Pg = Porphyromonas gingivalis	59,2
Tf = Tannerella forsythia	75,3
Td = Treponema denticola	70,1
Pi = Prevotella intermedia	38,5
Pm = Peptostreptococcus micros	29,3
Fn = Fusobacterium nucleatum/periodonticum	23,0
Cr = Campylobacter rectus	27,6
En = Eubacterium nodatum	14,8
Ec = Eikenella corrodens	19,4
Cs = Capnocytophaga spec. (gingivalis, ochracea, sputigena)	21,7

Tab 2: % e baktereve në semestrin e dytë të vitit 2013 në 308 pacientë

Grafiku 2: % e baktereve në semestrin e dytë të vitit 2013 në 308 pacientë

Konkluzione: Nga rezultatet vihet re se grupi bakterial më shumë i përfshirë është ai i kuq i Socransky, që mesatarisht kalon 70% të rasteve. Janë të nevojshme studime të tjera për të konfirmuar prevalencën bakteriale. Do të ishte interesante të vlerësonim përqendrimet e kombinuar me treguesit e ndryshëm gingival. Qasja me marker gjenetikë IL1 dhe studimi mikrobiologjik i florës bakteriale në zgavrën e gojës na ka dhënë mundësinë për të trajtuar në mënyrë racionale pacientët në kushte të rënda jo vetëm parodontale por edhe me sëmundje sistemike si diabeti dhe ato onkologjike (të trajtuar me radio terapi dhe me lezione osteonekrotike nga bifosfonatet). Rekrutimi i një numri më të madh pacientësh me patologji të ndryshme mund të ndihmojë mjekun që të qasë rastin në mënyrë të individualizuar, duke përmirësuar menaxhimin e komplikimeve të tipit infektiv.

Përktheu: Erjola Taga