Gingiviti: efektet surprizuese me një dietë me pak karbohidrate dhe shumë omega-3

Një dietë e studiuar me vëmendje është në gjendje të reduktojë inflamacionin gingival dhe parodontal: këtë e ka treguar një studim i publikuar në BMC Oral Health dhe që është kryer nga kërkues të Universitetit të Friburg, në Gjermani. Më saktë, ushqyerja optimale është e varfër me karbohidrate, e pasur me fibra, antioksidantë, acide yndyrore omega-3 dhe vitamina C dhe D.

Studimi pilot është kryer në një grup eksperimental të përbërë nga 10 persona me gingivit, të cilëve iu është kërkuar të ndjekin një dietë me karakteristika e treguara më lart, për katër javë, ndërsa pesë pjesëtarëve të tjerë, me gingiva me inflamacion, janë futur në një grup kontrolli. Treguesi i pllakës bakteriale, gjakrrjedhja gingivale, thellësia e shpimit dhe gjakosja gjatë shpimit janë kontrolluar në fillim dhe më pas çdo javë, gjatë një periudhe tranzicioni dhe më pas gjatë eksperimentimit.

Pavarësisht se treguesit e pllakës bakteriale janë mbajtur të pandryshuar te të dy grupet, të gjithë parametrat inflamator janë përgjysmuar te pacientët që kishin ndryshuar mënyrë e të ushqyerit: treguesi gingival ka kaluar nga një mesatare prej 1,10 në 0,54; gjakrrjedhja gjatë shpimit është ulur nga 53,57% në 24,17% dhe në fund sipërfaqja parodontale me inflamacion është reduktuar mesatarisht nga 638 mm2 në 284 mm2.

Rezultatet e prodhuara nga ndryshimi i ushqimit, pa ndonjë ndryshim në praktikat e higjienës orale, janë përkufizuar "impresionuese" nga vetë autorët. Dieta e ndjekur nga pacientët e grupit eksperimental ka sjellë lloje të ndryshme modifikimesh në krahasim me dietën e mëparshme, pra rezulton e pamundur që të kuptohet me saktësi se çfarë ndikimi kanë pasur komponentë të veçantë. Megjithatë, disa analiza statistikore të regresionit kanë treguar një lidhje veçanërisht të fortë ndërmjet përmirësimeve të arritura dhe dy parametrave: reduktimin e marrjes së karbohidrateve dhe marrjes së acideve yndyrore omega-3.

Adelmo Calatroni

Përktheu: Valbona Spahia