Vaksina kundër sëmundjes parodontale është më pranë, do të eksperimentohet në Australi duke filluar nga viti 2018

Vaksina e parë në botë kundër një sëmundje gingivale si parodontiti kronik, është shpallur nga kërkuesit australianë të Universitetit të Melburnit, që kanë publikuar rezultatet e tyre në "NPJ Vaccines", revista shkencore që lidhet me grupin Nature.
Eric C. Reynolds dhe kolegët e tij po punojnë prej 15 vjetësh dhe testet e para klinike te njerëzit mund të fillojnë në vitin 2018.

Sëmundja parodontale në gjendje të moderuar ose të rëndë, prek 50% të australianëve në moshë mbi 65 vjeç, por është përhapur në të gjithë botën; siç dihet shkatërron indin gingival dhe kockën që shërben si suport për dhëmbët dhe lidhet me sëmundje sistemike si diabeti, patologjitë kardiovaskulare, artritin reumatoid, demencën dhe disa lloje të kancerit.

Parodontiti shkaktohet nga grumbullimi i disa shtameve bakteriale dhe vaksina në studimin e skuadrës australiane ka për objektiv Porphyromonas gingivalis, agjenti patogjen që është konsideruar si përgjegjësi kryesor i sëmundjes, duke qenë në gjendje të ndryshojë ekuilibrin normal të mikroorganizmave prezentë në zgavrën e gojës. Reynolds ka arritur të evidentojë enzimat që prodhohen nga ky bakter te minjtë e laboratorit dhe ka menduar të stimulojë përgjigjen imunitare dhe prodhimin e antitrupave specifikë.

"Aktualisht trajtimi i sëmundjes parodontale ndodh nëpërmjet pastërtisë profesionale, - kujton profesor Reynolds - por me raste nuk mjafton dhe është e nevojshme t'i drejtohemi kirurgjisë ose të parashikojmë një profilaksi me antibiotikë. Këto metoda janë të dobishme por në shumë raste bakteri kthehet për tu stabilizuar në pllakën dentare duke provokuar një çekuilibër mikrobiologjik të tillë aq sa pengon shërimin e plotë. Parodontiti është shumë i përhapur dhe ka një potencial të lartë shkatërrues. Ne kemi shumë besim se kjo vaksinë mund të përmirësojë cilësinë e jetës së miliona personave."

Adelmo Calatroni